Visumsøkjarar skal registrerast i ein ny Schengen-database med fingeravtrykk og ansiktsfoto (såkalla biometriske opplysningar), i tillegg til meir vanlege personopplysningar.
I midten av oktober startar innføringa av Visa Information System (VIS), og Noreg begynner med utanriksstasjonar i Algerie, Egypt og Marokko. VIS vil vera ein felles visumdatabase for Schengen-landa, der personopplysningar om alle som har søkt om visum i eit Schengen-land blir lagra i same database.
Informasjonen vil vera tilgjengeleg for medlemslanda i behandlinga av visumsøknader, grensekontroll og identifisering. Også Europol, og politi som etterforskar terrorhandlingar eller anna alvorleg kriminalitet, kan få tilgang til basen.
Opplysningar kan lagrast i databasen i fem år.
I løpet av dei neste tre åra skal systemet vera i bruk overalt, og både politidistrikta og utanriksstasjonane har fått utstyr for opptak av biometri.
I regjeringas arbeidsprogram for EU/EØS-saker står det følgjande: «VIS vil gjøre det mulig å ha en smidigere og åpnere visumpraksis, siden systemet bl.a. vil gjøre det vanskelig å misbruke reisedokumenter og visum».
Statewatch skreiv nyleg om dei nye Schengen-verktøya for informasjonsinnhenting ved grenseovergangane: «Small steps to big brother».
