Sveriges riksdag vil at svenskane sjølve skal ha sisteordet i spørsmålet om gjeninnføring av grensekontroll.
Utspelet kjem som følgje av at Europakommisjonen førre månad føreslo regelendringar for når det kan innførast grensekontrollar i Schengen-landa, og at avgjerdsmakt skulle overførast frå medlemslanda til Kommisjonen i slike spørsmål. «Vi tycker att det är EU-kommissionen som har bevisbördan här [...] Man måste kunna visa att det faktiskt är ett problem och de har de själva sagt att det inte är», er beskjeden frå saksordførar i justiskomiteen i Riksdagen, Morgan Johansson (Socialdemokraterna).
Pressemeldinga frå komiteen: EU-förslag om gränskontroller vid de inre gränserna strider mot subsidiaritetsprincipen.
Det er venta at dette kommisjonsforslaget kan bli det første forslaget som blir stoppa av «gult kort-prosedyren», der nasjonale parlament har høve til å sjekka om forslaget er i samsvar med nærleiksprinsippet. Dersom om lag ni av dei 27 nasjonale parlamenta (ein tredjedel) forkastar forslaget må EU-kommisjonen gjera endringar i forslaget.
I IPEX-basen finn ein informasjon om behandlinga i dei ulike parlamenta, mellom anna at Frankrike har kome med grunngjeven uttale mot kommisjonsforslaget.
