Justiskommissær Viviane Reding informerte førre veke om arbeidet med europeisk personvern. Det er venta at Europakommisjonen kjem med ei oppgradering av personverndirektivet (frå 1995) i januar.
Samtidig har den britiske tenketanken Statewatch lekka fleire utkast til personvernreglar som Reding er venta å føreslå neste månad:
- ei forordning som skal erstatta 1995-direktivet: Regulation on the processing of personal data (forslaget er merka EØS-relevant)
- eit eige direktiv om vilkår for politi og rettssystem sin tilgang til personopplysingar: Police and Criminal Justice Data Protection Directive
- ei melding: Safeguarding Privacy in a Connected World A European Data Protection Framework for the 21st Century
IT-bransjens nettavis digi.no har oppsummert innhaldet i dei lekka dokumenta under tittelen EU vil diktere personvernet. Her står det også at Kommisjonen ønskjer å endra frå direktiv til forordning, fordi slike reglar blir gjort gjeldande for alle medlemsland med ein gong gyldige vedtak er gjort i Europaparlamentet og Ministerrådet. Digi.no skriv vidare at bedrifter med over 250 tilsette etter dei nye regelforslaga skal ha eigne personvernombod.
Direktør i Datatilsynet, Bjørn Erik Thon, sa følgjande etter ein personvernkonferanse i Brussel 6. desember: «Dette er et forslag som absolutt er EØS-relevant og vil ha innvirkning på fremtidig utforming av norsk personvernslovgivning. Det er høyst relevant å følge med på hva som skjer i EU på dette området og komme inn i prosessen så tidlig som mulig». EU-delegasjonen slår fast at forslag til endringar i dagens personvernregelverk vil vera viktige å følgja for Noreg.
