EU vil mista Tyrkia viss landet ikkje har blitt EU-medlem innan 2023. Det var bodskapen frå statsminister Recep Tayyip Erdoğan under ein panelsamtale i Berlin 30. oktober. Den tyrkiske republikken markerer sitt hundreårsjubileum i 2023.
Medlemskapsforhandlingane med Tyrkia begynte i 2005, men berre eitt av 35 kapittel er så langt avslutta, og 21 forhandlingsområde er blokkert.
I rapporten frå Europakommisjonen tidlegare denne månaden, kom det fram at Tyrkia ikkje møter standardar innan menneskerettar og ytringsfridom. Den tyrkiske økonomiministeren uttrykte då frustrasjon over at EU har «latt Tyrkia venta på døra i 50 år». I tillegg er Kypros-spørsmålet framleis uløyst (sjå notat om tyrkisk Kypros-politikk frå German Institute for International and Security Affairs).
