Europaparlamentet ber Rådet om å bestemma seg for iverksetjing av informasjonssystemet SIS II utan meir utsetjing.
SIS II skal i utgangspunktet bli lansert i januar 2013, men opphavleg skulle SIS II ha vore lansert allereie i 2007. Det kypriotiske formannskapet stadfestar at målet er å få ei formell godkjenning i Rådet i desember.
SIS II vil modernisera den felles informasjonsdatabasen, mellom anna ved å leggja til foto og biometriske fingeravtrykk. I regjeringa sitt siste arbeidsprogram for EU/EØS-saker står det at Noreg var i fremste rekke i utviklinga av SIS II og at ein bidrog aktivt i prosjektarbeidet. Europautgreiinga viste til at SIS-systemet blir brukt dagleg av norsk politi.
Tidlegare i år kom det også fram at Noreg ønskjer å delta i det nyoppretta IT-byrået i Schengen-samarbeidet, som både sikrar utveksling av data mellom nasjonale styresmakter og samlar administrasjonen av informasjonssystema VIS, Eurodac og SIS II. Utanriksministeren opplyste i Europautvalet 29. november 2011 at regjeringa skulle forhandla om dette i 2012.
