EU-landa skal nytta ei felles linje for å møta mindreårige som flyktar til unionen. - Det handlar om grunnleggjande prinsipp som alle EU-land må respektera, sa kommissær Cecilia Malmström då ho 6.mai presenterte handlingsplanen for einslege mindreårige.
Einslege mindreårige asylsøkjarar er eit aukande problem i EU: Mange tredjelandsborgarar eller statslause personar under 18 år kjem til EU utan å følgja ein ansvarleg vaksen. I dag er det store variasjonar i Europa når det gjeld korleis barn blir mottekne.
Målet med handlingsplanen er å få ein sikrare juridisk prosess som tek omsyn til barnas beste. Mellom anna skal barn få advokat når dei kjem til eit EU-land. Mens barna ventar på opphaldsvedtak skal dei plasserast i bustadar som tek omsyn til at dei er barn. Å frårøva eit barn fridomen skal vera siste utveg.
Eit anna framlegg i den nye planen er å framskunda asylprosessen, og Kommisjonen ønskjer at ei avgjerd skal takast innan seks månader. EU-landa bør også freista å spora opp familien til barna, og forsikra seg om at dei eventuelt kan reisa heim igjen. I leit etter slektningar skal det samarbeidast med friviljuge organisasjonar og kyrkjer.
Handlingsplanen var varsla i det nye Stockholmprogrammet, og er no sendt vidare til behandling i Rådet og Europaparlamentet.
