Dersom ein når målet om at ti prosent av all transportenergi skal koma frå fornybare kjelder innan 2020, vil det auka klimagassutsleppa i Europa. Det viser ein ny rapport frå Institute for European Environmental Policy. Alle medlemslanda i EU har lagt fram planar om å auka bruken av biodrivstoff fram mot 2020.
Ifølgje rapporten vil CO2-utsleppa bli mellom 80 og 170 prosent høgare per liter med biodrivstoff enn med tradisjonell bensin og diesel, gitt dagens miljøkrav i EU og Noreg.
Truls Gulowsen uttalar til Dagens Næringsliv at krava om biodrivstoff kan få negative verknader både for biologisk mangfald og klima. Miljøvernminister Erik Solheim uttalar til same avis at Noreg pressar på EU for å få på plass strengare klimakrav.
