Europakommisjonen la i dag fram ei melding om betre handtering av migrasjonsstraumane til EU-landa. Innanrikskommissær Cecilia Malmström kommenterte mellom anna mulegheitene for strengare grensekontroll, som Frankrike og Italia etterlyste i førre veke: «Det kan af hensyn til stabiliteten i Schengenområdet også blive nødvendigt under helt ekstraordinære omstændigheder midlertidigt at genindføre en vis kontrol ved de indre grænser, hvis dele af de ydre grænser kommer under kraftigt, uventet pres».
Malmström meinte framleis det var kome nokså få innvandrarar til Europa i samband med situasjonen i Middelhavsområdet, og slo vidare fast at innvandringa måtte handterast korrekt: «der skal sikres en effektiv grænsekontrol, og at ulovlige indvandrere skal sendes tilbage. Det betyder også, at vi ikke bør overlade det til medlemsstaterne ved EU's ydre grænser alene at håndtere ekstraordinære indvandringssituationer.»
Medlemmer av Europaparlamentet uttrykte seg skeptiske til strengare Schengen-reglar tidlegare denne veka.
Forslaget frå Kommisjonen innehaldt følgjande initiativ:
- Gjennomføring av eit felleseuropeisk asylsystem innan utgangen av 2012.
- Styrking av grensekontrollen i Schengen for å imøtegå ulovleg innvandring og sikra at medlemsstatane effektivt handterer yttergrensene.
- Meir lovleg innvandring til EU, kan hjelpa forventa mangel på kvalifisert arbeidskraft i Europa.
- Betre praksis for integrering av lovlege innvandrarar i medlemsstatane.
- Styrking av samarbeid med tredjeland gjennom å fremja lovleg innvandring, kombinert med tiltak for å hindra ulovleg innvandring.
Meldinga skal no diskuterast på ekstraordinært møte i Rådet 12. mai, og skal også vera med på dagsordenen på møtet i Det europeiske råd 24. juni.
