EU har slått fast at Noreg ikkje får unntak frå det nye direktivet for audiovisuelle medietenester. Det inneber at det blir vanskeleg å halda på forbodet mot alkoholreklame på norske TV-skjermar.
I eit brev frå kommisjonen til Utanriksdepartementet heiter det at Noreg kan oppretthalda nasjonalt forbod, men ikkje blokkera alkoholreklame sendt frå eit anna land. Det vil vera i strid mot fri flyt av tenester. Kristeleg folkeparti ønskjer å stoppa direktivet med reservasjon.
Tidlegare i sommar lovde EUs ambassadør til Noreg, Janos Herman, at dersom Noreg implementerte direktivet ville det ikkje skapa problem for den noverande ordninga med reklameforbod.
Visepresident i Europakommisjonen, Neelie Kroes, viser til at Sverige har ein streng alkoholreklamepolitikk og bilaterale ordningar med Storbritannia, noko statssekretær Erik Lahnstein i UD vil sjå nærmare på. «Men det er veldig stor forskjell på å ha et 100 prosent vern og å måtte gå inn i forhandlinger med andre land», seier Lahnstein til NTB.
I det nye arbeidsprogrammet for EU/EØS-saker står det følgjande om direktivet si betyding for Noreg: «Nåværende unntak er viktig for sammenhengen i norsk alkoholpolitikk. Saken må avgjøres før direktivet om audiovisuelle medietjenester kan innlemmes i EØS-avtalen».
