Situasjonen for flyktningar og asylsøkjarar til Hellas blei diskutert på rådsmøtet for justis- og innanriksministrane 27. oktober.
Innanrikskommissær Cecilia Malmström viste til ein fersk evalueringsrapport som skildra vanskelege forhold i Hellas: «the humanitarian situation in detention centres in Evros, at the border to Turkey, is still dreadful. […] These people must have clothes and access to medicines. Another big problem seems to be the inability of the Greek authorities to use the resources that have been made available to them».
Situasjonen i Hellas er no så alvorleg at landet mellom anna ønskjer å byggja eit gjerde langs grensa for å hindra tilstrøyminga av asylsøkjarar. Statssekretær Pål K. Lønseth i Justisdepartementet seier til VG 1. november at Noreg ønskjer å hjelpa Hellas med asylbehandlinga gjennom EØS-midlane. Lønseth deltok på den Schengen-relaterte delen av rådsmøtet førre veke.
Europakommisjonen si melding om eit system for sporing av terrorfinansiering (Terrorist Finance Tracking System – TFTS) blei også diskutert av ministrane. Rådet ønskte å vurdera ulike muligheiter for uttak av data i sporinga av terroristar og deira finansiering. Rådet bad også Kommisjonen om å vurdera verknader som meirverdi, juridiske aspekt og økonomiske aspekt ved eit slikt system.
Sjå også: Konstitutionsutskottet i Sveriges riksdag har uttalt seg om personvern og sporing av terrorfinansiering.
