Økonomien i både næringslivet og det offentlege vil tena på meir bruk av lagring i nettskyer («Cloud computing»). Det slår Europakommisjonen fast i ein ny strategi (merka EØS-relevant).
Bruk av nettskyer til oppbevaring av data (t.d. tekstfiler) og programvare inneber lagring i store serverparkar som brukarane har tilgang til via internett. Spørsmålet om personvern er sentralt i samband med slik lagring, og strategien er ei oppfølging av personvernforslaga frå Kommisjonen i januar. Om nokre månader vil Kommisjonen følgja vidare opp med ein eigen strategi for IT-sikkerheit.
I førre veke kom det også fram at Datatilsynet i Noreg er meir positive til lagring av mellom anna offentlege data i nettskyer. «Mange opplever at skytjenester gir dem større fleksibilitet. Hvis det samtidig er penger å spare, så er det fint det, så lenge man også kan ivareta personvernet», sa direktør Bjørn Erik Thon.
Sjå også rapporten Quantitative Estimates of the Demand for Cloud Computing in Europe and the Likely Barriers to Take-up frå International Data Corporation (IDC).
