EUs tilsyn for datasikkerheit, EDPS, kritiserte i sommar forslaga om «smarte grenser», som Europakommisjonen la fram tidlegare i år.
Forslaga, som mellom anna legg opp til elektronisk registrering av tredjelandsborgarar på inn- og utreise til Schengen-området, er ifølgje EDPS både «kostbare, uprøvde og inngripande». I det føreslåtte systemet skal det takast ti fingeravtrykk for å verifisera identiteten til personar ved grensene, og EDPS stilte spørsmål ved kor nødvendig det er å samla inn og oppbevara store mengder persondata sidan to eller fire fingeravtrykk er tilstrekkeleg for slik verifisering.
EDPS viste også til at stadig fleire databasar i grensekontrollarbeidet (VIS, SIS, Eurodac osb.) gjer det meir komplisert for reisande å utøva sine rettar, og såg med uro på den generelle trenden der politistyresmakter kan få tilgang til persondata som er samla inn før det har vore grunnlag for mistanke om kriminalitet.
Regjeringa meiner det føreslåtte systemet med «smarte grenser» er samanfallande med Noregs syn, men at det krev personvernomsyn: «Systemet vil kunne effektivisere grensekontrollen og motvirke ulovlig opphold. Det er sentralt at et slikt system ivaretar grunnleggende rettigheter, herunder personvern». Forslaget om «smarte grenser» er ein av hovudprioriteringane på justis- og innanriksfeltet for det litauiske EU-formannskapet i haust.
