Europakommisjonen føreslår fleire tiltak for å få ned talet på våpenrelatert vald i Europa. «Sidan 2010 har over 10 000 menneske blitt drept av skytevåpen i dei 28 medlemslanda», melder innanrikskommissær Cecilia Malmström. Samtidig viser ei ny undersøking at fleirtalet av europearar fryktar at våpenkriminaliteten vil auka dei neste fem åra, og fleirtalet meiner også det bør innførast strengare våpenregulering.
I ei ny melding føreslår Kommisjonen fleire tiltak som bør vurderast:
- Strengare fellesreglar for å sikra at skytevåpen som blir tatt ut av bruk ikkje blir brukt igjen.
- Felles system for å merka skytevåpen med serienummer for betre sporing.
- Felles minimumsreglar for strafferettslege sanksjonar ved til dømes illegal produksjon og smugling.- Innstramming av indre marknadsreglar knytt til innehav av skytevåpen.
- Betre kontroll ved sal og ulovleg våpenproduksjon. Kommisjonen legg også vekt på å møta nye utfordringar som våpensal via internett, 3D-våpen og ulovleg leveranse via posten.
- Teknisk bistand til tredjeland for å styrka deira eksportkontroll, stenga smuglarruter og kontrollera militære våpenlager.
Meldinga, som ikkje er merka EØS-relevant, dannar grunnlaget for vidare diskusjonar i EU-institusjonane. Eventuelle lovforslag kan ventast i 2015.
